Eanamihtidanlágádusa áššehasbálvalanbáikkiid rabasáiggit rivdet 16.1.2017 rájes.  Áššehasbálvalanbáikkiid rabasáiggit gáržžiduvvojit, go áššehasfitnamat bálvalanbáikkiin leat geahppánan ja bálvalusat fállojit ain eanet telefovnna, šleađgapoastta ja interneahta bokte.

– Eanamihtidanlágádusa beaktilvuohta ja gánnáhahttivuohta buoriduvvojit almmolaš hálddahusa ovddidanlinnjádemiid ja bálvalanbáikečielggadusa mielde. Danin buot bálvalanbáikkiid rabasáiggit dárkkistuvvojit nu, ahte vástidit dáláš ja boahttevaš áššiiddikšunmeriid. Seammá háve vuhtiiváldojit elektrovnnalaš áššiiddikšuma atnuiváldima ja eará ovddideami váikkuhusat áššiiddikšuma dárbui  báikki alde, muitala Eanamihtidanlágádusa diehtobálvalusain vástideaddji hoavda Antti Saarikoski.

Rabasáiggiid rievdadeapmi ii dagat bargiid geahpedeami. Bálvalanbáikkiid mearri ii geahppán ja Eanamihtidanlágádus bálvala boahttevuođasge riikkaviidosaččat.

Rabasáiggit vuođđuduvvet áššehasmeriide

Áššehasmeriid dáfus stuorra bálvalanbáikkit leat boahttevuođas rabas juohke árgebeaivve dmu 9.00–16.15. Dát bálvalanbáikkit leat Helsset, Kuopio, Oulu, Roavvenjárga, Tampere, Turku ja Vaasa.

Oassi bálvalanbáikkiin lea rabas juogo guokte dahje golbma beaivve vahkus dmu 9.00–16.15. Rabasbeaivvit molsašuddet bálvalanbáikkiid mielde.

Bálvalanbáikkit, mat leat rabas guokte beaivvi vahkus:

• má ja di: Iisalmi, Avvil, Guossán, Lappeenranta, Lohja ja Seinäjoki
• du ja be: Kajaani, Kokkola, Lahti, Porvoo, Savonlinna ja Duortnus

Bálvalanbáikkit, mat leat rabas golbma beaivve vahkus:

• má, di ja ga: Hämeenlinna, Maarianhamina, Mikkeli ja Joensuu
• ga, du ja be: Jyväskylä, Kouvola ja Pori

Riikkaviidosaš áššehasbálvaleapmi bálvala telefovnna bokte árgan dmu 9.00–16.15. Lassin áššehasbálvaleapmái sáhttá váldit oktavuođa šleađgapoasttain dahje elektrovnnalaš skoviin, mii gávdno interneahttasiidduin. Maiddái poastta bokte sáhttá ain áššiid dikšut. Ohcamušaid sáhttá guođđit lohkká poastakássii, mii lea bálvalanbáikki olggobealde, maiddái gitta doallanáiggiid.

Ovcci báikegottis sirdásuvvo ovddalgihtii áiggivárremii

Bálvalanbáikkiid Alajärvi, Huittinen, Ikaalinen, Giemajávri, Nurmes, Närpiö, Saarijärvi, Salo ja Ylivieska áššehasbálvaleami doaibmamálle ođasmahtto ja dain váldojuvvo atnui ovddalgihtii áiggivárrenvejolašvuohta. Das áššehas váldá vuos oktavuođa riikkaviidosaš telefonbálvalussii. Juos ášši lea luonddu dáfus dakkár, ahte dan ii sáhte čoavdit telefovnnas, sirdá áššehasbálvalančálli ášši bálvalanbáikái čoavdima várás.

Dáid bálvalanbáikkiid oasil lohkká poastakássa, mii lea olggobealde, váldojuvvo eret uhcánaš geavaheami dihtii.

Gielddaid ja eanangottiid lihtuid gulaskuddan

Rabasáiggiid gáržžideamis lágiduvvojedje gulaskuddamat. Gielddaid ja eanangottiid lihtuid cealkámušain eai boahtán ovdan áššit, mat easttášedje ođđa rabasáiggiid atnuiváldima. Cealkámušat váldojedje vuhtii vejolašvuođaid mielde mearrádusbargamis.

Bálvalanbáikkiid ođđa rabasáiggit gávdnojit 16.1.

Lassidieđut

Hoavda Antti Saarikoski, 040 501 0151, etunimi.sukunimi@maanmittauslaitos.fi