Oasuslanjadagaid dieđut ođđa registarii jagi 2019 rájes

Boahtte jagi Suomas váldojuvvo atnui elektrovnnalaš oasuslanjadatregisttar, gosa čoggojit dađistaga viiddes dieđut visteossosiid oamastusain ja pántemiin.

Jagi 2019 rájes visteoasussearvvit ja gaskasaš giddodatoasussearvvit sáhttet sirdit oasuslogahallama oasuslanjadatregistarii ja seammá háve luohpat geatnegasvuođas oasuslogahallama bajásdoallamii. Sirdima eaktun lea, ahte fitnodatsearvvi ovddasteaddjidieđut leat gávperegistaras áiggi dásis.

Dieđihit visteoasusservviide ja hovdejeaddjiide lahkalebbos sirdináigemeari, man láhkai sirdin geavadis bargojuvvo. Seamma háve dárkkálmahttit sierra doaibmabijuid áigetávvaliid.

Dán muttus visteoasusservviin eai eaktuduvvo doaibmabijut.

Elektrovnnalaš registtar boahtá báhpára sadjái

Boares visteoasusservviid ossosiid oamasteaddjimerkejumit nuppástuvvet elektrovnnalažžan muttuid mielde. Ovddimužžan dárbbašuvvojit fitnodatsearvvi doaibmabijut. Easkka das maŋŋá ovttaskas oasusoamasteaddji oasusgirjji sáhttá muhttit elektrovnnalažžan.

Vuosttas muttus visteoasussearvi sirdá oasuslogahallama elektrovnnalaš oasuslanjadatregistarii. Das maŋŋá oasusgirji fámohuhtto maŋimustá dan guoski gávppi dahje pántema oktavuođas. Seamma háve oasuslanjadatregistarii nannejuvvo elektrovnnalaš oamasteaddjimerkejupmi.

Ođđa visteoasussearvvit vuođđuduvvojit elektrovnnalažžan jagi 2019 rájes. Báber oasusgirjjit eai dan maŋŋá šat prentejuvvo, dasgo dieđut gávdnojit elektrovnnalaš oasuslanjadatregistaras.

Registtar, mii lea áiggi dásis, lasiha luohtehahttivuođa

Ođđa oasuslanjadatregisttar buorida ássanlanjadagaid guoski dieđuid sihke daid oamasteaddji- ja pántendieđuid oažžuma ja luohtehahttivuođa.

Registtar ráhkaduvvo eana- ja meahccedoalloministeriija ASREK-prošeavttas ovttasbarggus eará ministeriijaiguin. Oasuslanjadatregistara bargá Eanamihtidanlágádus ovttas Pateanta- ja registtarráđđehusain, Vearrohálddahusain ja Álbmotregisttarguovddážiin.

Oasuslanjadatregistara guoski láhkaásaheami lea bárrásiin válmmaštallamin. Registtar váldojuvvo geavahussii das maŋŋá, go láhka boahtá fápmui.

Lassidieđut:

www.osakehuoneistorekisteri.fi

 

Uusimmat uutiset ja blogit