Dán geasi Eanamihtidanlágádusa Báikediehtoguovddáš FGI dutkit mihtidit Suoma lossodatfámu njeallje sierra sajis birra Lappi. Bargun lea čuovvut lossodatfámu nuppástusaid ja buvttadit das áigeguovdilis dieđu.
– Mii čuovvut mo lossodatfápmu nuppástuvvá jahkásaččat. Lossodatfámu nuppástusaide váikkuhit máŋggat sierra dahkkit, nu mo eatnama alláneapmi. Go eana allána, maiddái mátki eatnama gaskačuoggás nuppástuvvá, ja lossodatfápmu geahppána. Dáid nuppástusaid lea dehálaš čuovvut, go áigeguovdilis diehtu lea vealtameahttun ovdamearkka dihte lossodatfápmovuogádahkii, allodatvuogádagaide ja geoidamállii, maid bajásdoallan gullá Eanamihtidanlágádusa guovddáš bargguide, muitala dutkanjoavkohoavda Mirjam Bilker-Koivula Eanamihtidanlágádusa Báikediehtoguovddážis.
Lossodatfápmodiehtu olles Suoma dárbbuide
Servvodaga máŋggat doaimmat vuođđuduvvet luohtehahtti ja dárkilis mihtidandihtui. Lossodatfápmui vuođđuduvvi diehtu dárbbašuvvo earret eará satellihttalokaliseremii, čáhcejuogadeapmái ja golggiidussii. Huksemii diehtu dárbbašuvvo eanabajildusa stáđisvuođa árvvoštallamii. Lossodatfápmodiehtu geavahuvvo maid málmmaid ja eará luondduriggodagaid ohcamis sihke eatnandoarggástusaid ja dollaváriid čuovvumii.
Dutkit dahket mihtidemiid absoluhttagravimehteriin, mii lea lossodatfámu sturrodaga dárkilit mihtideaddji bierggas. Absoluhttagravimehter johtá dutkiid mielde dehálaš instrumeantan báikegottis nubbái.
Eanamihtidanlágádusa dutkit čađahit lossodatfápmomihtidemiid GNSS- nappo satelihttalokaliserenstašuvnnain miehtá Suoma. Juohke jagi Eanamihtidanlágádus dahká mihtidemiid 6-7 stašuvnnas nu ahte golbma jagis čađahuvvojit mihtideamit oktiibuot 20 GNSS-stašuvnnas. Dán jagi lea Lappi vuorru. Geasset dutkit dahket mihtidemiid Kolaris, Soađegilis, Savuguoikkas ja Sinehagas Eanodagas. Lappi GNSS-stašuvnnain čađahan láhkái mihtideamit fuolahit iežaset oasil das, ahte diehtu olles Suomas lea gokčevaš.
Lassedieđut
Mirjam Bilker-Koivula TkD, dutkanjoavkohoavda, 029 531 4696, ovdanamma.sohkanamma@maanmittauslaitos.fi