Geassebajis Eanamihtidanlágádus áibmogovve sullii goalmmádasa ja láserskánne sullii ovccátoasi Suoma viidodagas.
– Geasi áigge govven láhkái guovllut oidnojit min neahttasiidduin beaiváduvvi dillekárttas. Čohkkejuvvon áibmogovven- ja láserskánnenmateriála vehkiin mii beaivádit eanadatdiehtovuođu ja buvttadit áigedását dieđu virgeoapmahašbargui sihke servvodaga ávkin. Ovdamearkka dihte Biebmovirgedoaimmahat dahká materiálain bealdogohcima, man vuođul mearriduvvojit eanandoallodoarjaga, muitala kártáhoavda Juha Kareinen Eanamihtidanlágádusas.
Gii beare sáhttá čuovvut Eanamihtidanlágádusa girdinmašiinna girdingeainnu maiddái Flightradar-bálvalusas.
Dálki váikkuha govvengirdimiid áigedávvalii
Eanamihtidanlágádusa girdinmašiidna girdá sullii čieža kilomehtera allodagas.
– Áibmogovvemiidda gusket dárkilis kvalitehtagáibádusat. Dálki galgá leat jalahas ja beaivváš galgá báitit doarvái allin, vai govat lihkostuvvet. Ovttaskas guovlluid govvema áigi mearriduvvo dálkediliid mielde, Kareinen lohká.
Suoma guovllus garrasit jagi 2022 rájes lassánan satellihttalokaliserema heađušteapmi dagaha hehttehusa buot satellihttalokaliserema geavaheaddjiide, nu mo girdin- ja mearrajohtolahkii. Satellihtalokaliserenheađušteapmi dagaha riskkaid ja hehttehusaid maid Eanamihtidanlágádusa juohkejahkásaš áibmogovven- ja láserskánnengirdimiidda.
– Mii leat ráhkkanan dillái ja ohcat aktiivvalaččat sierralágan teknihkalaš čovdosiid, vai áibmogovven lihkostuvvá bures, Kareinen nanne.
Rabas data ja mearkkašahtti materiála virgeoapmahašgeavahussii
Eanamihtidanlágádus bajásdoallá girdimiin fidnejuvvon materiála vehkiin álbmotlaš eanadatdiehtovuođu, mii lii dárkilamos olles riikka gokčevaš kártamateriála. Bargguin Eanamihtidanlágádus dorvvasta luohtehahtti kárttáid ja báikedieđuid dál ja boahttevuođas.
Meahciráđđehus ja Meahcceguovddáš geavahit materiála vuvddiid inventeremii nappo meahcceriggodatdieđu buvttadeapmái. Biebmovirgedoaimmahat dahká materiálain bealdogoziheami, man vuođul mearriduvvojit eanandoallodoarjagat. Eará ovttasbargoguoimmit ja materiála geavaheaddjit leat earret eará Suoma birasguovddáš, Geologiija dutkanguovddáš, Luondduriggodatguovddáš, Vávlevirgedoaimmahat ja Bealuštanfámut.
Varas áibmogovat almmustahttojit nuvttá Kártabáikkis geasi áigge dađe mielde, go dat gerget. Láserskánnenmateriálas dahkkojuvvo Kártabáikái oppalašdorvvolašvuođasivaid geažil eahpedárkilut veršuvnnat rabas ja almmolaš materiálan.
Viiddis virgeoapmahašovttasbargu dorvvasta servvodaga doaibmama
Dán geasi girdet vuosttas háve ođđa álbmotlaš áibmogovven- ja láserskánnenprográmma mieldásaččat. Prográmmain sihkkarasto, ahte virgeoapmahaččain ja riikkavuložiin leat geavahusas luohtehahtti ja áigedását kárttát sihke báikedieđut olles Suomas.
– Máŋggaid hálddahussurggiid ovttastahtti ovcci organisašuvnna ovttasbargu dahká vejolažžan gollobeaktilis dieđučohkkema, mii lea riikkaidgaskasaččatge erenoamáš virgeoapmahašmálle, Kareinen muitala.
Ovttasbargu sihkkarastá, ahte virgeoapmahaččain lea geavahusas diehtu, man vehkiin barggut dikšojuvvojit beaktilit ja servvodaga doaibmama sáhttá sihkkarastit.
Lassedieđut
Kártáhoavda Juha Kareinen tel. 029 531 5030, ovdanamma.sohkanamma@maanmittauslaitos.fi