Lotnut, nu mo stáhta, gielddat ja fitnodagat, mákset 1.8.2025 fápmui boahtán lotnunlága nuppástusa mielde eananoamasteaddjiide márkanárvui vuođđuduvvi olles buhtadusa lassin 25 proseantta.
– Láhkanuppástusa mearkkašahttimus ášši lea buhtadusdási bajideapmi, muitala lotnumiin vástideaddji jođiheaddji Mauri Asmundela Eanamihtidanlágádusas.
Eanamihtidanlágádusas buorre gearggusvuohta heivehit nuppástuvvan buhtadusdási
Dásseválddi presideanta nannii lotnunlága nuppástusaid 4.7. Láhka bođii fápmui 1.8.2025.
– Eanamihtidanlágádusas lea hui buorre gearggusvuohta heivehit oanehis áiggis nuppástuvvan láhkaásaheami, Mauri Asmundela lohká.
Eanamihtidanlágádusa doaibman lea jo dán rádjái vuođđuduvvan márkanárvui vuođđuduvvi olles buhtadusa meroštallamii.
– Mis leat jo ovddežis máhttu ja proseassat márkandili ja duopmostuoluid mearrádusaid čuovvumii. Dál mii nannet, ahte maid bajiduvvon buhtadusdássi vuođđuduvvá lága oaivvildan vugiin čuozáhagaid márkanárvvuide, Asmundela dadjá.
Láhka heivehuvvo jo jođus leahkki sullii 800 lotnundoaimmahussii. Lotnundoaibmagoddi mearrida buhtadusaid lotnundoaimmahusa loahppačoahkkimis.
Lotnunbuhtadusat márkanárvui ja árvočuohppannjuolggadus eret
Lotnunláhkii dahke earáge unnit nuppástusaid.
Juos lotnunbuhtadus guoská ássanviste- dahje ámmátopmodahkii, galgá lotnundoaibmagoddi buhtadusaid mearridettiin sihkkarastit, ahte buhtadussubmi reahká sullasaš opmodaga háhkamii mánahuvvon opmodaga sadjái.
25 proseantta bajádus guoská čuozáhaga, nappo ovdamearkka dihte manahuvvon eanaviidodaga buhtadeapmái ja hehttehusa, nu mo šláma dahje eanadathehttehusa buhtadeapmái. Márkanhaddái bajádusgerddona haga buhtaduvvojit vahágat, nu mo áiddi cuovkaneapmi ja ovdogohcingolut, dego juristabálkkát.
Lotnunlága nuppástusas čielggasmahte dál maid tearpmaid. Lága ovddit veršuvnnas 1970-logus boahtti tearpma “dohkálaš haddi” (suom. käypä hinta) sadjái bođii dál čielgasut tearbma “márkanárvu”.
Maiddái hui hárve geavatlaččat heivehuvvon, muhto prinsihpalaččat problemáhtalaš ng. árvočuohppannjuolggadus váldui eret lágas.
Lotnut leat dávjá stáhta, gielddat sihke šleađga- ja eanagássafitnodagat. Dat lotnot viidodagaid dahje viidodagaid geavahanvuoigatvuođaid luonddusuodjálanguovllu, eatnangeainnu, dáluid huksema dahje fápmolinnjá várás. Stáhtaráđđi mieđiha lotnunlobiid váldegottálaš infrastruktuvrii dahje viiddis almmolaš dárbbuide.
Eanamihtidanlágádusa eanamihtidaninšenevrra jođihan lotnundoaibmagoddi vástida lotnunbuhtadusaid mearrideamis Suomas.
Loga lasi
Lotnundoaimmahus (suomagillii)
Stáhtaráđi dieđáhus lága nuppástusain (suomagillii) (valtioneuvosto.fi)
Fidnosiidu: Lunastuslain korvausperusteiden uudistaminen (valtioneuvosto.fi)
Lassedieđut
Lotnun- ja árvvoštallandoaimmahusain vástideaddji jođiheaddji Mauri Asmundela
029 531 5115, ovdanamma.sohkanamma@maanmittauslaitos.fi