Giddodatgávpi ovdána elektrovnnalaččat, go oamasteaddjidieđut gávdnojit registaris
Čilgenlágačuorvva álkida áššiid dikšuma erenoamážit jápminbeasi oktasaš giddodaga vuovddedettiin dahje juogedettiin. Go lágačuorvvaduođaštusas oaidná njuolgga giddodaga oamasteaddjiid, vuovdi ii dárbbaš addit gávppašeami oktavuođas eará duođaštusaid oamastanvuoigatvuođastis.
Giddodatgávppi sáhttá dahkat elektrovnnalaččat Eanamihtidanlágádusa giddodatgávppi bálvalusas, go oamasteaddjidieđut leat áiggi dásis. Osolaččat eai dárbbaš mátkkoštit gávpedilálašvuhtii, baicca vuolláičállosat ja gávpegirjji eavttuid dárkkisteapmi lihkostuvvet vaikko geassestobu gáttis.
– Go jápminbeasi osolaččaid dieđut leat registaris áiggi dásis, vuovdindilálašvuođas ii dárbbaš roggat ovdii vaikkoba testameantta dahje árbegirjjiid. Jápminbeasi áššegirjjit sisttisetdollet olu dieđuid ovdamearkka dihte jáválašvuođa birra, iige daid oru vealttakeahttá vuogasin čájehit oastái, guhte ii gula jápminbeassái, muitala jođiheaddji Stefan Nåhls Eanamihtidanlágádusas.
Oahpásmuva Áššiiddikšunbálvalussii ja du oamastan giddodagaid dieđuide
Čilgenlágačuorvvaohcamuša sáhttá dahkat Eanamihtidanlágádusa áššiiddikšunbálvalusas. Lágačuorvva máksojuvvo ohcamuša dahkama oktavuođas. Gii beare jápminbeasi osolaččain sáhttá dahkat ohcamuša iige nuppiin osolaččain dárbbaš váldegirjji dahje vuolláičállosa ohcamuša dahkamii. Ohcamuša mielddusin dárbbašuvvojit jábmi árbegirje- ja sohkačielggadusat sihke vejolaš testameanta.
Aiddo dál ohcamuša gieđahallanáigi lea sullii vihtta vahku. Čilgenlágačuorvaga gánnehage ohcat buriid áiggiid maŋimustá dan muttus, go jápminbeassi plánegoahtá vuovdit giddodaga.
– Buot giddodatoamasteaddjit gánnehit čálihit iežaset Eanamihtidanlágádusa áššiiddikšunbálvalussii ja oahpásmuvvat dan geavaheapmái. Iežas oamastusaid dárkkisteapmi lea álki. Čilgenlágačuorvaga dahkan lea Áššiiddikšunbálvalusas njuovžil ja dan bokte sáhttá sáddet dárbbašlaš áššegirjjiid maiddái maŋŋelgihtii, bálvalandoavda Saara Vesa movttiidahttá.
Lassedieđut
Jođiheaddji Stefan Nåhls, giddodagaid oamastusa bálvalusat ovdanamma.sohkanamma@maanmittauslaitos.fi