Priváhtageaidnodoaimmahus

Geaidnovuoigatvuohta oaivvilda bissovaš, giddodahkii gullan vuoigatvuođa geavahit nuppi giddodaga guovllu johtima várás.

Doaimmahusain figgat čuovvut eanaomasteaddjiid dahkan soahpamušaid, muhto vuoigatvuođa sáhttá dihto eavttuid vuođul oažžut maiddái almmá soahpamuša dahje losiduvvon giddodaga oamasteaddji miehtama. Geaidnovuoigatvuođa vuođđudeamis ja gieđahallamis mearriduvvo priváhtageaidnolágas.

Bissovaš geaidnovuoigatvuohta ođđa priváhtageidnui sáhttá šaddat dušše eanamihtidandoaimmahusa bokte ja dat ii leat sorjavaš giddodaga oamastannuppástusaide. Geainnu geavaheapmi lea vejolaš maiddái eanaoamasteaddji soahpamušain, muhto dákkár vuoigatvuohta čatná dušše soahpamuša dahkan olbmuid.

Priváhtageaidnodoaimmahusas sáhttá maiddái addit mearrádusaid árabut vuođđuduvvon geaidnovuoigatvuođa ávkkástallamis dahje čoavdit geaidnovuoigatvuhtii gullevaš eahpečielggasvuođaid.

Doaimmahusas mearridit ee. čuovvovaš áššiin:

  • Geaidnovuoigatvuođa vuođđudeapmi, sirdin dahje heaittiheapmi
  • Geainnu ráhkadan- ja fuolahusgoasttádusaid juohkin geaidnooasálaččaid gaskka
  • buhtadusat
  • geavahanrivttiid vuođđudeapmi muoraid seailluheami, biilabáikki, fanasbáikki dahje kádja várás
  • geaidnogotti vuođđudeapmi
  • geainnu ávkkástallamii gullevaš eahpečielggasvuođa čoavdin

Priváhtageaidnodoaimmahusa sáhttá ohcat ee. geaidnooasálaš, giddodaga oamasteaddji dahje oasseoamasteaddji, ja geaidnogoddi. Geaidnogotti ohcan gáibida geaidnogotti čoahkkima mearrádusa doaimmahusa ohcamis. Ohcamuša dahká geaidnogotti sátnejođiheaddji dahje geaidnogotti fápmudan olmmoš.

Oza priváhtageaidnodoaimmahusa

  1. Čohkke vejolaš áššái gullevaš mildosiid, dego soahpamušat ja kártasárgosat, ja vurke daid pdf- dahje jpg-hámis. Soahpamuššii sáhtát ávkkástallat gárvves soahpamušmálle (pdf suomagillii, suomi.fi).
  2. Oza doaimmahusa Áššiiddikšunbálvalusas (suomagillii): vállje vuos giddodaga ja makkár doaimmahusa ozat, deavdde dasto ohcamuša dieđuid ja lavtte ohcamuššii vejolaš mildosiid.

Sáhtát ohcat doaimmahusa maiddái ohcamušskoviin (pdf), jus dus ii leat vejolašvuohta geavahit Áššiiddikšunbálvalusa.

Priváhtageaidnodoaimmahusa golut

Golut šaddet doaimmahussii geavahuvvon bargoáiggis. Geaidnodoaimmahusa goluin vástida dábálaččat ohcci dahje geaidnogoddi.

Doaimmahusa bistin

Doaimmahus bistá gaskamearálaččat sulaid 5 mánotbaji. Doaimmahusa gieđahallanáigi álgá ohcamušastat ja nohká doaimmahusmearrádusa registreremii giddodatdiehtovuogádahkii.

Haddi

Hattit, suomagillii.