Geaidnovuoigatvuohta lea vuoigatvuohta geavahit nuppi oamastan guovllu vuodjinfievrruin johtimii. Geaidnovuoigatvuohta sáhttá leat sohppojuvvon olbmuid gaskkas dahje vuođđuduvvon virggálaččat.
- Olbmuid gaskkas sohppojuvvon vuoigatvuohta guoská dušše daid olbmuide, geat leat dahkan soahpamuša. Go ovdamearkka dihte oamasteaddji molsašuvvá, sohppojuvvon vuoigatvuohta ii leat šat vealttekeahttá fámus.
- Virggálaččat vuođđuduvvon geaidnovuoigatvuohta lea giddodaga bissovaš vuoigatvuohta, masa oamasteaddji molsašuvvan ii váikkut.
Virggálaš geaidnovuoigatvuohta vuođđuduvvo priváhtageaidnodoaimmahusas. Priváhtageaidnodoaimmahusas sáhttá maid sirdit geaidnovuoigatvuođa ja muhttit geaidnovuoigatvuođa govdodaga dahje eará geaidnovuoigatvuhtii laktáseaddji ášši. Go geaidnovuoigatvuhtii ii leat šat dárbu, maid dan heaittiheapmi gieđahallo priváhtageaidnodoaimmahusas.
Sáhtát dárkkistit iežat giddodaga virggálaš geaidnovuoigatvuođaid Áššiiddikšunbálvalusas (suomagillii). Oassi geaidnovuoigatvuođain leat historjjálaččat eaige dat vealttekeahttá oidno bálvalusas. Bálvalusas ii leat diehtu das, gullágo du giddodat osolažžan muhtin geaidnogotti geidnui.
Geaidnovuoigatvuhtii gullá johtima lassin vuoigatvuohta geainnu huksemii ja šattuid eret njáskamii. Geaidnovuoigatvuođa ožžon oassebealli oažžu hukset geainnu ja fuolahit geainnu. Geaidnovuoigatvuođa guovllus oažžu čorget eret muoraid, ovssiid ja eará šattuid eananoamasteaddji sierranas lobi haga.