Rádjágeavvamiin sáhtát čielggadit eahpečielga rájá saji dahje ođadit láhppon rádjágeađggi. Sáhtát dárbbašit rádjágeavvama, go háliidat hukset rájá lahka, leat vuovdimin iežat giddodaga dahje plánet vuovdečuollama. Sáhtát dárbbašit rádjágeavvama maid dalle, juos leat ovdamearkka dihte goaivumiin sirdán rádjágeađggi eret sajistis.
Rádjágeavvama maŋŋá rájá sadji lea čielggas ja dárbbašuvvon rádjágeađggit leat ođaduvvon.
Rádjágeavvama bistin ja muttut
Rádjágeavvan bistá sullii 4 mánotbaji.
Ohcamuša maŋŋá
- Oaččut almmuhusa, mas leat rádjágeavvama gieđahalli eanamihtidaninšenevrra oktavuođadieđut. Sáhtát váldit oktavuođa eanamihtidaninšenevrii, juos rádjágeavvamis lea hoahppu.
- Don oaččut almmuhusa das, goas rádjágeavvan dahkkojuvvo. Eanamihtidaninšenevra sádde almmuhusa sullii mánotbaji ovdal gieđahallama maiddái ránnjáide.
Gieđahallan (sullii 3 mánotbaji ohcamušas)
- Báikki alde eanamihtidaninšenevra ohcá ja mihtida rádjágeđggiid ja eará rájá saji čájeheaddji mearkkaid.
- Buot oassebealit ožžot muitalit iežaset oainnu rájá sajis.
- Eanamihtidaninšenevra mearrida guovllu rájáid ja bidjá dárbbašlaš rádjágeđggiid.
- Rádjágeavvan gieđahallo čoahkkimis, mas ii leat vealtemeahttun leat mielde.
Gieđahallama maŋŋá (sullii 1 mánotbadji gieđahallamis)
- Oaččut rehkega, juos don leat rádjágeavvamis meroštallon máksin. Máksináigi lea tiippalaččat 30 beaivvi.
- Ođđa dieđut leat registaris oaidnimis.
Almmuhuvvon áiggit leat gaskamearálaččat. Áiggiide váikkuha ovdamearkka dihte jagiáigi, go dálvit ii leat dábálaččat vejolaš dahkat mihtidemiid.
Haddi
Rádjágeavvama haddái váikkuhit rájá guhkkodat, rádjágeđggiid mearri ja rádjái laktáseaddji giddodagaid mearri. Ovdamearkka dihte 100 mehtera guhkkosaš rádjá guovtti giddodaga gaskkas ja ovtta rádjágeađggi ođadeapmi máksá 670 €. Haddi sisttisdoallá buot rádjágeavvamis dárbbašlačča, nu mo mihtidemiid ja rádjágeđggiid.
Rádjágeavvamis máksu juhkkojuvvo dábálaččat jeavda rádjáránnjáid gaskan. Juos rádjágeađggi cuvken oassebealli ohcá rádjágeavvama, son máksá mávssu ollásit.
Ná ozat rádjágeavvama
Ovdal rádjágeavvama ohcama gánneha ságastallat ránnjáin. Rádjágeavvama sáhttá ohcat giddodaga oamasteaddji dahje rádjáránnját ovttas. Maiddái rádjágeađggi cuvken oassebealli sáhttá ohcat rádjágeavvama.
- Čohkke vejolaš mildosiid ja vurke daid pdf- dahje jpg-hámis. Sáhtát laktit ovdamearkka dihte kárttá dahje gova eahpečielga rádjágeađggis.
-
Oza rádjágeavvama Áššiiddikšunbálvalusas:
- persovdnaáššehasat (suomagillii)
- organisašuvdnaáššehasat (suomagillii)Bálvalussii sáhttet čálihit iežaset organisašuvnna beales sisa dat olbmot, geaidda lea merkejuvvon gávperegistarii organisašuvnna nammačállinvuoigatvuohta.
- Vállje vuos giddodaga, masa ozat rádjágeavvama. Vállje “Eanamihtidandoaimmahusat” ja “Oza rádjágeavvama”.
- Deavdde ohcamuša dieđuid ja lavtte ohcamuššii vejolaš mildosiid.
Sáhtát ohcat doaimmahusa maiddái báberhámát ohcamušskoviin (pdf, suomi.fi) (suomagillii), juos dus ii leat vejolašvuohta geavahit Áššiiddikšunbálvalusa.
Juos háliidat doaimmahusa áššegirjjiid elektrovnnalaččat alccet, váldde suomi.fi-dieđuid atnui (suomagillii).