Ovdal giddodatgávppi
- Dárkkis jo ovdal giddodatgávppi
- lágačuorvvaduođaštusas, ahte oamasteaddjidieđut leat áiggi dásis
- losádusduođaštusas, ahte giddodagas eai leat boarásmuvvan dahje dárbbašmeahttun merkemat
- giddodatregisttarváldosis, ahte geavahanvuoigatvuođat ja ráddjehusat leat áiggi dásis
- Sáhtát oastit giddodahkii laktáseaddji váldosiid ja duođaštusaid Áššiiddikšunbálvalusas. Loga lasi máksin láhkái váldosiid diŋgomis.
- Atte oastái dárkkistan láhkái lágačuorvvaduođaštusa, losádusduođaštusa ja giddodatregisttarváldosa.
- Juos du giddodagas leat giddehusat, soaba oastiin daid jámiheamis dahje sirdimis oastái dahje oasti báŋkui. Loga lasi giddehusa nuppástuhttimis. Sohppojuvvon áššiid gánneha čállit gávpegirjái.
- Fuom! Juos don leat jápminbeasi osolaš ja vuovdimin jábmi namas leahkki giddodaga, oamastusa čielggasmahttima (suomagillii) gánneha ohcat ovdal gávppi. Dalle oastái ii dárbbaš addit jábmi árbegirjji ja sohkačielggadusa oamastusa registrerema várás. Oamastusa čielggasmahttima maŋŋá giddodatgávppi sáhttá dahkat maiddá elektrovnnalaččat Giddodatgávppi bálvalusas.
- Juos don leat vuovdimin giddodagas viidodaga nappo mearreviidodaga, lavtte gávpegirjái kárttá, masa vuovdinláhkái viidodat lea merkejuvvon. Sáhtát sárgut vuovdinláhkái viidodaga kárttá Kártabáikkis (suomagillii) Mihtit viidodaga -doaimmain. Sáhtát čálihit du sárgon kárttá nuvttá.
Giddodatgávpedilis
- Sáhtát vuovdit iežat giddodaga álkimusat Giddodatgávppi bálvalusas. Dalle gávpegirjji sáhttá dahkat ja vuolláičállit gos ja goas beare iige gávpi gáibit gávpenannejeaddji. Oahpásmuva dárkilut rávvagiidda.
- Juos it sáhte dahkat gávppi Giddodatgávppi bálvalusas, daga gávpegirjji báberhámis. Dalle dárbbašat maiddái gávpenannejeaddji mielde gávpedahkandilálašvuhtii. Oza gávpenannejeaddji oktavuođadieđuid.
Giddodatgávppi maŋŋá
- Oasti dahje su báŋku ohca gávpedahkama maŋŋá giddodaga oamastusa registrerema.
- Sáhtát dárkkistit Áššiiddikšunbálvalusas (suomagillii), leago oasti ohcan oamastusa registrerema.