Priváhtageaidnodoaimmahussii sáhttá leat dárbu, go dárbbašat bissovaš geaidnovuoigatvuođa dahje háliidat nuppástusaid dálá geaidnovuoigatvuođaide. Priváhtageaidnodoaimmahusas sáhttá čoavdit maiddái geainnu geavaheapmái laktáseaddji áššiid, dego goluid juohkima geainnu geavaheddjiid gaskkas. Geaidnogotti vuođđudeami ja geaidnogottiid ovttastahttima sáhttá maid gieđahallat priváhtageaidnodoaimmahusas.
Priváhtageaidnodoaimmahusa áššiin gánneha soahpat ovddal gihtii eará giddodatoamasteddjiiguin. Priváhtageaidnodoaimmahusas áššiid sáhttá čoavdit maid soahpama haga ja eananoamasteaddji vuostálastimis fuolakeahttá.
Priváhtageaidnodoaimmahusa muttut ja bistin
Priváhtageaidnodoaimmahus bistá sullii 6 mánotbaji.
Ohcamuša maŋŋá
- Oaččot almmuhusa, mas leat priváhtageaidnodoaimmahusa gieđahalli eanamihtidaninšenevrra oktavuođadieđut. Sáhtát váldit oktavuođa eanamihtidaninšenevrii, juos priváhtageaidnodoaimmahusas lea hoahppu.
- Don oaččut almmuhusa das, goas priváhtageaidnodoaimmahus dahkkojuvvo. Eanamihtidaninšenevra sádde almmuhusa sullii mánotbaji ovdal gieđahallama buohkaide daidda, geaidda ášši guoská.
Priváhtageaidnodoaimmahus (sullii 6 mánotbaji ohcamušas)
- Priváhtageaidnodoaimmahus gieđahallo eanamihtidaninšenevrra doallan čoahkkimis, mas ii leat vealtemeahttun leat mielde.
- Čoahkkimis eanamihtidaninšenevra čielggada olbmuid oaiviliid gieđahallanvuloš ášši birra.
- Dárbbu mielde fitnat dutkamin geainnu báikki alde.
- Eanamihtidaninšenevra mearrida gieđahallan láhkái ášši.
Gieđahallama maŋŋá (sullii 1 mánotbadji gieđahallamis)
- Oaččut rehkega, juos don leat priváhtageaidnodoaimmahusas meroštallon máksin. Máksináigi lea tiippalaččat 30 beaivvi.
- Ođđa dieđut oidnojit registaris.
Almmuhuvvon áiggit leat gaskamearálaččat. Áiggiide váikkuha ovdamearkka dihte jagiáigi, go dálvit geainnu dutkan ii leat vealttekeahttá vejolaš.
Haddi
Priváhtageaidnodoaimmahusa haddi hápmašuvvá geainnu guhkkodagas ja giddodagaid mearis. Ovdamearkka dihte 300 mehtera guhkkosaš geaidnovuoigatvuohta guovtti giddodaga guovllus máksá 1 490 €.
Máksu juhkkojuvvo oassebeliide ožžojuvvon ovddu mielde. Ovdamearkka dihte dušše ovtta giddodahkii vuođđudan láhkái geaidnovuoigatvuođa mávssu máksá vuoigatvuođa ožžon giddodaga oamasteaddji.
Hattis lea vejolaš oažžut 50 % vuoládusa. Vuoládusa oažžu, juos buot gieđahallan láhkái áššiin lea sohppojuvvon ovddal gihtii ja sáddet soahpamuša ohcamuša mielde. Vuoládusas mearriduvvo loahpalaččat doaimmahusas.
Ná ozat priváhtageaidnodoaimmahusa
Ovdal priváhtageaidnodoaimmahusa ohcama gánneha ságastallat eará vuoigatvuhtii laktáseaddji giddodatoamasteddjiiguin. Soahpamuša dahkan ovdal priváhtageaidnodoaimmahusa ohcama álkida ášši gieđahallama. Soahpamuša dahkamii sáhtát geavahit válmmaš soahpamušskovi soahpamušskovi (suomagillii) dahje dahkat soahpamuša eará vugiin.
Priváhtageaidnodoaimmahusa sáhttá ohcat geainnu geavaheaddji dahje eananoamasteaddji, guhte oamasta geainnu buohta leahkki eatnama. Maiddái geaidnogoddi sáhttá ohcat priváhtageaidnodoaimmahusa, go ohcamis lea mearriduvvon geaidnogotti čoahkkimis.
- Čohkke vejolaš mildosiid ja vurke daid pdf- dahje jpg-hámis.
Oza priváhtageaidnodoaimmahusa Áššiiddikšunbálvalusas:
- persovdnaáššehasat (suomagillii)
- organisašuvdnaáššehasat (suomagillii)Bálvalussii sáhttet čálihit iežaset organisašuvnna beales sisa dat olbmot, geaidda lea merkejuvvon gávperegistarii organisašuvnna nammačállinvuoigatvuohta.
- Vállje vuos giddodaga, masa ozat priváhtageaidnodoaimmahusa. Vállje dasto “Eanamihtidandoaimmahusat” ja “Oza priváhtageaidnodoaimmahusa”.
- Deavdde ohcamuša dieđuid ja lavtte ohcamuššii vejolaš mildosiid.
Sáhtát ohcat doaimmahusa maiddái ohcamušskoviin (suomi.fi) (suomagillii), juos dus ii leat vejolašvuohta geavahit Áššiiddikšunbálvalusa.
Juos háliidat doaimmahusa áššegirjjiid elektrovnnalaččat alccet, váldde suomi.fi-dieđuid atnui (suomagillii).