Eanamihtidandoaimmahusain gieđahallojit giddodagat ja daid geavaheapmái laktáseaddji áššit. Gieđahallan dahkkojuvvo čoahkkimis. Čoahkkimii bovdejuvvojit buohkat, geaidda gieđahallan láhkái ášši guoská.
Eanamihtidandoaimmahusa áššit gieđahallojit ja mearrádusat dahkkojuvvojit doaimmahusčoahkkimis. Oahpásmuva du fidnen čoahkkinbovdehussii fuolalaččat. Bovdehusas gávnnat dieđu doaimmahusa ulbmilis sihke doaimmahusčoahkkima áiggis ja báikkis.
Mii čoahkkimis dáhpáhuvvá?
Čoahkkimis ovdanbuktojuvvo gieđahallan láhkái ášši. Juos lea gažaldat viidásut fidnus nu mo eatnangeainnu huksemis, mielde lea dávjá maid huksejeaddji ovddasteaddji muitaleamin dárkileappot fidnu birra.
Čoahkkima oktavuođas sáhttit maid fitnat báikki alde dutkamin dahje mihtideamin gieđahallan láhkái guovllu. Seammás sáhttá bidjat dárbbašlaš mearkkaid dahje rádjágeđggiid. Muhtumin mihtideamit leat dahkkojuvvon jo ovdal čoahkkima.
Maid don sáhtát bargat?
Juos dus eai leat fuomašuhttimat dahje gažaldagat, don it dárbbaš bargat maidige. Čoahkkimii oassálastin ii leat vealtemeahttun.
Čoahkkimis sáhtát jearrat áššiid birra, muitalit iežat oaivila ja bidjat gáibádusaid. Čoahkkimii oassálastin leage buoremus vuohki váikkuhit gieđahallan láhkái áššái.
Juos it beasa čoahkkimii mielde ja háliidat muitalit iežat oaivila, sáhtát váldit oktavuođa doaimmahusinšenevrii. Gávnnat doaimmahusinšenevrra oktavuođadieđuid čoahkkinbovdehusas. Sáhtát maid fápmudit geannu ovddastit du čoahkkimis. Fápmudusa gánneha addit ovddasteaddjái čálalaččat, muhto fápmudusa hápmi lea friddja.
Gii mearrida áššiin?
Doaimmahusas viggat soahpat áššiin sierra oassebeliid gaskkas. Mearrádusaid dahká loahpas doaimmahusinšenevra. Muhtin dáhpáhusain mearrádusaid dahká doaimmahusinšenevra ovttas guvttiin gieldda válljen oskojuvvon albmáin.
Doaimmahusinšenevra mearrida buot dárbbašlaš áššiin, vaikko dat eai livčče gáibiduvvon čoavdin láhkái. Dát oaivvilda ahte ovdamearkka dihte buhtadusaid sáhttá mearridit máksin láhkái, vaikko dat eai livčče gáibiduvvon.
Doaimmahusas dahkkojuvvon mearrádusaide sáhttá ohcat nuppástusa. Nuppástus ohccojuvvo eatnanrievttis ja áigi nuppástusa ohcamii lea 30 beaivvi áššegirjjiid sáddemis.
Lassedieđut jođus leahkki doaimmahusain
Oasis jođus leahkki viidát eanamihtidandoaimmahusain lea iežas neahttasiidu, gos gávdnojit lassedieđut doaimmahusas. Du doaimmahusa neahttačujuhus muitaluvvo čoahkkinbovdehusas. Neahttasiiddut eai leat dušše guovtti dahje moadde giddodahkii guoskevaš doaimmahusaide, dego laigemiidda.
Sáhtát ohcat doaimmahusa doaimmahusa nummiriin, sajádatgielddain dahje doaimmahusšlájain Jođus leahkki doaimmahusat -siiddus (suomagillii).